جلس أبو صطيف الحلبي على كرسي واستند بكوعه إلى البار طالباً زجاجة بيرة. وبعد أن شرب نصفها التفت إلى شخص نحيل صامت يجلس بجانبه وقال له:
عفواً أخي.. ما تعرفنا على الاسم الكريم، أنا أبو صطيف الحلبي تاجر ألبسة داخلية، يعني أنا في بيروت للشغل، بس بحب البسط ومشان هيك جئت للبار، بس أنا ما بحب أقعد خالي النديم.. مشان هيك بدي أساويك نديمي، عفواً ليش اسم المحل شيه اندريه؟
- ……………(1)
- ها.. على اسم صاحب المحل.. هادا نفسه اللي عم يعطينا الطلبات.. حلو.. أخي شيه إذا سمحت قنينة بيرة تانية، شوف أخي.. عفواً ما تعرفنا على الاسم الكريم؟
- ……………
- زياد؟.. أهلاً أخي زياد.. بس ما قلت لي زياد إيش؟
- ……………
- رحباني؟! إي بيت رحباني معروفين عندنا في حلب وسمعتهم متل المسك، أهلاً وسهلاً أخي زياد، ما قلت لي اش بتشتغل؟
- ……………
- موسيقي؟… يعني آلاتي(2)، على أي آلة بتعزف؟
- ……………
- بيانو؟! أي اش عليه، البيانو آلة كويسة، بس المهم وين بتعزف وبتغني.. بأي مطعم يعني؟
-..……………
- ما بتعزف بالمطاعم ولا بتغني بالأعراس؟ أي ما بيصير أخي زياد، اذا بدك تظل تسجل لحالك كاسيتات ما بتستفيد شي.. بيرة أخي شيه، لازم تغني بالأعراس مشان تطالع مصاري، أخي تعال لحلب وأنا بدبرك لأنو المطرب سمير جركس صاحبي للموت، سمعان فيه طبعاً، أي أبو سمرة أشهر من نار على علن(3)، بحكي لك معه مشان تطلع كورس وراه بالأعراس والتلبيسات، ما فيها شي.. شكراً أخي شيه، وإذا بتعزف وراه بتاخد مصاري أكتر بس بدك تغير آلتك لأنو البيانو.. عدم المؤاخذة -تقيل وبيلزمه سيارة سوزوكي تجيبه على الحفلة وأربع حمالين يطلعوه على السطح، لأنو كل الحفلات والتلبيسات والطهورات وحفلات التسريح والنجاح في البكالوريا وشهادة السواقة بيصيروا على السطح متل ما بتعرف، بقي غيّر هالآلة وشوف الشغل، ما بتعزف على آلة خفيفة ونظيفة؟
- ……………
- بزق؟! أي البزق كويّس وفهمان ودقيق، بعدين البزق آلة حزينة وبتسبب الفرح، وشغلتك سهلة بالعزف و بالغناء، بالعزف بيلتفت أبو سمرة عليك وبيقول لك "دولاب بيات أبو الزوز" اش بتعمل أنت؟!.. بتعطيه دولاب بيات، بس إنشالله تكون بتعرف بالمقامات أخي زياد؟!..
- ……………
- بتعرف؟! إي منيح كتير، وبالنسبة للغناء أسهل بكتير، أبو سمرة بيقول "كنا ستة على النبعة" وأنت بترد وراه "أجا المحبوب صرنا سبعة"، دير بالك تخربط بالرقم، يعني عملية حسابية بسيطة 6+1=7، لأنك إذا خربطت بيزعل منك أبو سمرة وساعتها ما في مجال للنقاش بتحمل آلتك وبترجع لحياة الظلمات في بيروت، وانتبه أخي زياد من شغلة تانية بتصير بالتلبيسات وهي "القتيلات"، يعني بس يصير سوء تفاهم بين المعازيم بدل ما يضربوا بعضهم بيضربوا الفرقة، وساعتها أبو سمرة بيصيح بالفرقة "فكوا الجهاز" انتو بتفكوا الجهاز وكل واحد منكم بيحمل آلته بإيد وبالإيد التانية بيساعد زميله على حمل "البافل"،وتحت شعار "اللي بيحب النبي يخلي" بتفركوها قبل ما تاكلوا قتلة، على كل حال مالنا علاقة بالطوارئ. بتخلص الحفلة وبتاخدلك شي 400 ليرة -بيرة أخي شيه- وبتروح على مطعم "حنا كعدة"(4) بتقعد وبتصيح "بطحة عرق يا ابني" وبتسكت، دير بالك تحكي غير هالجملة، بعدين يبنخرب بيتك بالحساب، وكمان لأنو ما في داعي لشي -أهلاً أخي شيه- على اعتبار انو بطحة العرق بينزل معها صحن حمص وصحن بطاطا مسلوقة وصحن لبنة ببلاش، بعدين بتقول للكرسون "روح جيب صحن حمض وتوم وزيت وصحن كبير فاضي وبطريقك جيب لنا بصلة خضراء" وهي الشغلات كلها ببلاش بالإضافة لخبز التوست اللي بتكسره وبتحطه بالصحن الفاضي وبعدين بتفرم البصلة فوقه وبتحط كمون وفليفله ونعناع وملح وبتصب فوقه الحمض والزيت بصير قدامك وجبة محترمة بتاكلها وبعدين بتاخد شفة عرق ولحسة لبنة ليش؟!.. لأنو اللبنة بتعمل "لحاف"(5) حول المعدة وبالتالي ما بيؤذيك العرق، بتخلّص وبتدفع 50 ليرة بس.. يعني دولار وبتمشي، ومشان يصير الكرسون صاحبك ناوله خمس ليرات.. ليش؟ مشان كلما تجي يقول لك بصوت عالي "أهلاً يا أستاذ زياد" وهيك بيصيروا الزبائن يحسبوا لك حساب، وغير هيك بيصير الكرسون يسرق لك كم صحن من هون ومن هون وبيحطهم قدامك وهو عم بيقول "شرّفت أستاذ زياد" وبعدما تخلّص بتركب بالسرفيس وبتروح على ساحة الكلاسة عند "أبو حمدو الشوّا" اللي بيوقف عربانته بنص الساحة وبتطلب سيخ معلاق (6) مشوي بـ 25 ليرة وكاس عرق كبير بعشر ليرات، بتاكل وبعدين بتشرب على مهلك والمازا تبعك ريحة الشوي، بس ما سألتني عن المعنى من روحتك لعند أبو حمدو، هون حطنا الجمال، لأنو أبو حمدو ملتقى الفنانين بدك تقول نقابة فنانين.. ليش؟.. لأنو كل الفنانين بعد ما يخلصوا حفلاتهم بيجوا لعنده وهنيك خود نقاشات بالفن واستفيد أخي زياد من الفنانين وهم يتناقشوا على الـ"دو" والـ"ره" والـ"نهاوند" و"العجم" والـ"دُم" و الـ"تك"، طبعاً هي شغلات صعبة عليك أخي زياد بس أش المانع أنو الإنسان يتعلم؟!.. ما قلت لي أخي زياد في حدا غيرك بالعائلة بيغني؟
-……….
- الوالدة؟! شي حلو -بيرة أخي شيه- وأش اسمها؟
-………
- فيروز؟.. فيروز اسم حلو وفني، أي والله حرام عليك أخي زياد، ليش خانقها هون ببيروت؟ جيبها لحلب مشان تنطلق، لأنو كل الفنانين في العالم انطلقوا من حلب، حرام عليك تارك الوالدة ببيروت لا حدا بيعرفها ولا حدا سامع فيها، إي حلب بالنسبة للفنانين "كراج انطلاق". بزمانه محمد عبد الوهاب أجا من الصومال ما كان حدا بيعرفه، ومن حلب انطلق، وكمان عبد الحليم حافظ وعبده الحامولي وسيد درويش وجمال الدين الأفغاني. أخي بنجيب الوالدة وبنحطها عند الحاجة أمي بيتسلوا مع بعض وهنيك بشوف لها أعراس نسوان تغني فيهن.. يعني ما في ولا زلمة بالعرس والفرقة اللي معها كمان نسوان، قدرية على العود وأم ديبو على الكمنجة وأم شمندي على الرق وعيوش على الدربكة وهيك بيصير عنا بالفرقة تخت شرقي، وأنا أموت بالتخت الشرقي.. ليش؟! أخي بيناسبنا أكتر من التخت الغربي، لأنو التخت الغربي ضيق وما بيتحمل، بعدين بيزقزق كتير، يعني عدم المؤاخذة نحن نسواننا "حسن وسمن وغمازات" (7)، والتخت الغربي ما بيتحملهم. إي بيخفس تحتهم وبينكسر بينما التخت الشرقي واسع ومريح وقوي، أخي مصمم على مزاجنا، ما هو مستورد متل التخت الغربي، أي أنا ما أطيق الاستيراد.. بحب التصدير أكتر، أنا كان عندي شركة استيراد وتصدير، بتعرف اش عملت؟!.. قلبتها تصدير صافي وألغيت الاستيراد.. هيك الشغل أخي زياد.
- بعدين بس تصير الوالدة معروفة بنعمل لها حفلات على مسرح نقابة الفنانين، وأنا بدبر المسرح لأنو كل المسؤولين بالنقابة أصحابي، والموافقات أنا بجيبها من السياسية والجنائية، وبالنسبة للإعلانات بيعمل لنا اللافتات صاحبي الخطاط "عبد" بالشام، أي "عبد" أشهر خطاط بالشام ومحله ملتقى الفنانين من ياسين بقوش لعمر حمدي مالفا لأبو عنتر لنعيم حمدي الفنان العالمي اللي راح لكوريا الشمالية وغنى باللغة الكورية الشمالية "هبي برث دي تويو" المهم بعدما نحط الإعلانات شوف الجمهور شلون بدو يجي، وإذا -لاسمح الله- ما أجا حدا بنعمل حركة بسيطة وبنغير حرف واحد من اسم الوالدة بدل الفاء بنحط نون، يعني بدل فيروز بيصير الاسم "نيروز" (8)، وساعتها شوف إخواننا الأكراد شلون بدهم يحجزوا الصالة كومبليه لمدة شهرين، ما شي أخي زياد، تحياتي.. فكر بالموضوع وبعد أسبوع بشوفك بنفس هالمحل.. عجبني.. وخاصة أخي شيه (9).. سلام.
إقرأ المزيد:-